سؤال وجواب لاصحاب المعاشات حول العلاوات الخمسة
سؤال وجواب حول العلاوات الخمسة ، حيث يجري البحث بشكل كبير عن العلاوات الخمسة للاستعلام عنها وذلك بمجرد ان أعلنت الدكتورة نيفين القباج وزيرة التضامن الاجتماعي بدء صرف العلاوات الخمسة من اول يوليو 2020 ، وسط حالة من التوهان في طريقة حساب العلاوات ومن يستحقها ومن لا يستحقها ، وفي المقال التالي سوف نعرض أغلب الاسئلة الشائعة باللغة العامية والاجابة عليها بالعامية أيضا :
هل مستحق للعلاوات ام لا مستحق اذا كنت
(١)موظف حكومة او قطاع عام وطلعت معاش بعد ٣٠ يونية ٢٠٠٦ يعني اللي خرج ٣٠ يونية وقبله مالهوش
(٢)لو انت كنت شغال قطاع خاص بس مشترك في العلاوات الخاصة يعني ايه؟!
يعني القطاع الخاص دة هو كل شركة او مصنع او محل او اي جهة انت شغال فيها عند حد تاني (غير الحكومة اوشركات قطاع الاعمال اللي هما زي التليفونات وشركة المية مثلا)
اللي كان متأمن عليه عامل في محل مثلا دة مش مشترك ف العلاوات الخاصة يبقى مالوش فى الخمس علاوات .
شركات القطاع الخاص الكبيرة باختصار هي اللى هتكون مشتركة ف العلاوات الخاصة ، وبالتالي لو انت كنت قطاع خاص ومشترك ف العلاوات الخاصة يبقى ليك طالما خرجت بعد ٣٠ يونية ٢٠٠٦
(٣) انت مالكش ف العلاوات لو كان متامن عليك سواق او مقاولات او مخابز او تباع او فلاح او صاحب عمل (عندك محل او ورشة او مصنع …الخ) وكل من هو غير مندرج في البندين ١ ، ٢ .
👈 انا ارملة وباخد معاش زوجي انا والاولاد هل ليا في العلاوات؟
اه ليكي في العلاوات؟
بس المرحوم يكون (حكومة او عام او خاص) زي ما وضحت في رقم 1 ، 2
احنا ورثة ، وصاحب المعاش مات ومفيش حد بياخد معاشه .. هل من حقنا صرف المتجمد ؟؟
لا طبعا مش من حقكم .
انا قريت المنشور كويس ولقيت ان مستحق في العلاوات .. اقدم ورق ولا اعمل ايه علشان اصرفهم ؟
ما تعملش حاجة صرف العلاوات من غير اي اجراءات هيتم آلي .
يعني ايه متجمد 5 سنين بس!!حد يفهمني؟؟
يعني انت هتصرف الفلوس اللى نقصت من معاشك بسبب عدم اضافة العلاوات بس عن ٥ سنين فقط .
لا انا مش فاهم قاصدك ايه .. ممكن توضح اكتر شوية علشان نفهمك .
مفيش مانع .. اوضحلك بمثال صغير علشان كلنا نفهم .
انت دلوقتي خرجت معاش ومستحق للعلاوات (سواء ليك علاوة واحدة او علاوتين او حتى 5 علاوات)
نتفق مبدئيا كدة انك هتصرف مستحقاتك عن سنين
عام يوليو ٢٠١٥
يوليو ٢٠١٦
يوليو ٢٠١٧
يوليو ٢٠١٨
يوليو ٢٠١٩
يوليو ٢٠٢٠
ليه بقى .. انا طالع معاش من قبل كدة بكتير .. المفروض اخد كل السنين .
علشان اي مستحقات مالية ليها تقادم 5 سنين يعني لو ليك فلوس من ١٠ سنين مش هتاخد غير اخر 5 سنوات بس لان كل اللي زاد عن 5 سنين يسقط بقوة القانون(ومش هنطول في الكلام عن التقادم لان دة مش موضوعنا ومش تخصصنا)
خلاص فمهني هيحسبولي 5 سنين ازاي؟
مش هقدر احسبلك بالظبط فلوسك كام لان القيمة هتختلف من معاش للتاني بلا شك لكن هقولك انك ليك متجمد بمبلغ كويس جدا وكل ما يكون ليك علاوات اكتر
كل ما تاخد مبلغ اكبر .
طيب في جداول منشورة على الفيس مكتوب فيها المبالغ .. هل دي صح؟؟
بلاش تنساق ورا اي كلام لم يصدر من مختص .. بمجرد تحديد القيمة بشكل قاطع هننشر على الصفحة .
عايز اعرف انا هاخد فلوسي ازاي؟
هل هاخدها دفعة واحدة بشيك؟ولا بالتقسيط على الڤيزا ؟
السؤال دا مش هنعرف نجاوب عليه حاليا
للان مفيش معلومة مؤكدة فيه بس الغالب هيكون علي فيزه المعاش المستفيدين في المعاش في شهر سبعه٢٠٢٠
واكيد هنجاوب عنه في الفترة اللي جايةلما نتأكد تماما .
طيب كدة انا فهمت المتجمدات .. ممكن توضيح اكتر عن العلاوات ؟؟
