جمال يوسف بعد إصابته بالسرطان :” دعم السوشيال ميديا فرق معايا “

قال الفنان جمال يوسف في تصريحات صحفية : ” دعم السوشيال ميديا فرق معايا، مكنتش بعرف أتكلم غير لما بنتي قالتلي أنت قالب الدنيا على فيس بوك والناس بتدعيلك ” ، وتابع : “أنا تعبان من 6 شهور وقافل على نفسي، أنا مبسوط إني شفت حب الناس وأنا عايش”.

وأضاف:”أنا تعبان من 6 شهور وقافل على نفسي، ولما شفت حب الناس وأنا عايش.. لقيت نفسي بتكلم، وعايز أشرب بعد دعم الناس، مع إني مكنتش بشرب بقالي 3 شهور”،وأكمل :”جسمي بدأ يضعف وكنت وصلت لليأس بعد ما رقبتي اتحرقت من الإشعاع.. قولت مش هتعالج وهسيب قدري لربنا وقربت منه، ابني قالي أرجوك أنا حاسس إني ضهري اتكسر من غيرك، فقررت أكمل جلسات الإشعاع، رغم إني تعبت ولساني اتحرق”.

وأضاف باكيا : “الأول كنت خايف من الموت، ولما قربت من ربنا مبقتش خايف، أنا بس خايف من مقابلة ربنا، عايز استغفر كتير قبل ما أقابله، أنا بني آدم وأكيد عندي ذنوب”.

صرح يوسف:”الفنان محمد صبحي يتواصل معي يوميا وأخبر طبيبي أنه يرغب في تحمل نفقات سفري للعلاج إلى الخارج”، تابع :”أنا مش محتاج حاجة، النقيب أشرف زكي ملاك مش إنسان، تكفل بجميع نفقات علاجي ولم يتركني”.

وأضاف أن وفاء عامر وسامح الصريطي وهبة توفيق وإيمان شعبان وعمرو عبد الجليل وعدد كبير من الفنانين حرصوا على التواصل معه ودعمه.

ويذكر أن المخرج تامر حمزه أعلن عن مرض صديقه جمال يوسف الذى أصيب بسرطان البلعوم ، عبر صفحته على فيسبوك.